Најновиот роман на Оливера Николова - „Песот со тажен поглед“ е величествено верен на нејзиниот модел романи со „подготовка“, со истражуваање, со подметнување божем обичен лист хартија во фактите кој потоа, внатре, во самите факти, се отвора како цел фиктивен книжевен град. Како оние сликовници чиишто страници се претвораат во замоци и други чуда во три димензии, изникнувајќи од обична книга. Само навидум како секоја друга „Песот со тажен поглед“ е токму таков фиктивен книжевен град изникнат од листот мушнат во „Мојот балкански дневник“ од Џ.Џонстон Абрахам. Оваа мемоаристичка книга Николова не ја крие, со неа го започнува својот роман, заблагодарувајќи му се на Џ.Џ.Абрахам и целиот свој роман именувајќи го само како ехо на неговите спомени.

Оливера Ќорвезироска

Кон крајот на 2018 година, преводот на романот „Вежби за Ибн Пајко“ на српски и на бугарски речиси истовремено беше објавен во Белград („Архипелаг“) и во Софија („Изида“). Овој роман, досега преведен на руски и чешки, беше избран од страна на меѓународната фондација Форум за словенски култури како дел од проектот „Сто словенски романи“ чијашто цел е размена меѓу земјите во кои се зборуваат словенски јазици, со цел да се создадат пошироки основи за меѓусебно разбирање на соодветните словенски традиции и култури, а и во истовреме и можност за запознавање на несловенскиот свет со словенските литератури.

Преведувач на „Вежби за Ибн Пајко“на српски е Мирослав Мрковиќ, а на бугарски Деница Проданова.