Во издание на „Меандер“ од Загреб, во превод на Јелена Лужина, а во уредништво на Бранко Чегец, „Кадифената покривка“ - книга новелети за жени-убијки сега достапна и за хрватските читатели.
 
Главните личности во оваа книга се автентични, како и нивните дејанија. Некои од нивните основни биографски податоци се преземени од „Речникот на убијците“ од Рене Реувен. Останатото е плод на авторовата имагинација.
 
Изданието на книгата на хрватски јазик е поддржано од книжевната мрежа „Традуки“.

„Дневник“, „Нова Македонија“ 17 март 2017 г.

Пешаци по црни полиња е насловот на новиот роман на писателката Оливера Николова, што го објави издавачката куќа „Матица македонска“. Николова е во редот на водечките романсиери во современата македонска литература, авторка на богат прозен опус во кој од специфичен агол ги согледува историските, националните и социјалните превирања, вели во поговорот на книгата Гоце Смилевски.

Како вешто прозен мајстор пишува за општественото раслојување во годините кога се трансформираат институциите и низ ткаежот на животните приказни се разобличуваат многубројни човечки судбини. Новото романескно остварување претставува круна на богатиот творечки опус што писателката ни го завешта во изминатите децении – пишува Смилевски за новото дело на Николова.